روايات وقصص

انتقام اب

أمي! الحقي! مديري في البنك قافل تليفونه، ووصلني إيميل رسمي إن كامل المديونية اتباعت لجهة استثمارية خاصة ورافعة علينا دعوى إفلاس وحجز تحفظي فوري على كل حساباتنا وحسابات الشركة والفيلا دي!

سميحة وقفت والقهوة ادلقت على الروب الستان

إنت بتقول إيه يا غبي؟ إفلاس إيه؟ والوسايط بتاعتنا؟ مين الجهة دي؟

طارق وهو بينهج

شركة الصاوي الدولية للاستثمار والتخزين… الصاوي! الاسم ده مش غريب عليا يا أمي!

سميحة صرخت فيه

صاوي مين وزفت مين؟ أنت هتتجنن؟! دا تشابه أسماء، أبوها شحات كحيان كان سايق عربية خردة!

وقبل ما طارق يرد، صوت فرملة عربيات مرسيدس سودا وجيب دفع رباعي سدت الشارع قدام الفيلا المكسورة بوابتها. نزل منها رجالة ببدل رسمية، ومعاهم محضرين محكمة وقوات تنفيذ الأحكام، وعلى راسهم المستشار وحيد الرشيدي.

دخل وحيد بخطوات واثقة، ورمى الإخطارات القضائية على الترابيزة قدام عيون سميحة وطارق المبحلقة

صباح الخير يا سميحة هانم. أنا المستشار وحيد الرشيدي، الوكيل العام عن الحاج فتحي الصاوي… ومعايا أمر تنفيذ حجز فوري وطرد، وأمر ضبط وإحضار للأستاذ طارق بتهمة التزوير واستعمال محررات مزورة والشروع في ضرر السيدة مريم فتحي الصاوي.

سميحة رجعت لورا خطوتين ورجليها مش شايلاها، صوتها طلع مخنوق ومكسور

فتحي مين؟… الراجل بتاع شبرا؟!

وحيد بصلها بابتسامة سخرية حارقة

الحاج فتحي الصاوي، اللي مكنش عاجبكوا بيته البسيط… هو اللي مشتري كل شبر انتوا واقفين عليه دلوقتي، وسايبلكوا مهلة ساعتين تلموا هدومكوا في شناط زبالة وتخرجوا من ملكه.

في اللحظة دي، تليفون طارق رن. الرقم كان محفور في ذاكرته، رقم موبايل فتحي القديم.

طارق فتح السبيكر بإيدين مفككة ورعشة هستيرية.

صوت فتحي جه من السماعة، هادي، عميق، ومقلق

قولتلك يا سميحة وانتي واقفة تتشمتي ع الباب… انتي لسه ماتعرفيش انتي عملتي إيه في نفسك وفي ابنك. زمانك فهمتي دلوقتي مين فينا اللي كحيان، ومين اللي هيقضي بقية عمره يترجى اللقمة. الحساب لسه مبدأش يا طارق… ده كان بس الباب اللي بنخبط بيه عليكم.

الخط قطع، والبوليس دخل يكلبش طارق وسط صراخ وعويل سميحة اللي وقعت على ركبها في صالة الفيلا، وكل المظاهر والبرستيج دابوا تحت جزمة الحقيقة المرة.

الجزء الثالث

صوت الكلبش وهو بيقفل على إيد طارق كان عامل زي ضربة الرحمة اللي بتفرتك آخر قشرة من قشور المظاهر الكدابة. سميحة هانم كانت واقعة على السجادة التبريزي اللي في قلب الريسبشن، روب الستان بتاعها متمرمغ في التراب اللي دخل من البوابة المخلوعة، وعينيها متثبتة على المحضرين ورجال تنفيذ الأحكام وهما بيمروا بالدفاتر والشمع الأحمر.

طارق كان وشه مشدود وعينيه مبرقة بقلق هستيري، بيحاول يعافر مع عساكر الشرطة وصوته طالع مخنوق ومكسور

إنتوا مش عارفين بتكلموا مين! أنا طارق الديب! المستشار فؤاد الديب

يقربلي، واللواء شريف يبقى ابن عم والدتي! أنتوا اتجننتوا؟ بتكلبشوني في بيتي وعلى أرضي وبأمر مين؟ حتة راجل سواق كحيان على المعاش؟!

وحيد الرشيدي،

المحامي، كان واقف ضامم إيديه ورا ضهره، باصص لطارق ببرود تام مفيش فيه ذرة تعاطف. طلع سيجار هادي وولع طرفه ونفخ الدخان في الهوا، وقرب خطوتين من طارق اللي كان بيترعش

بص يا طارق بيه… الديباوية بتوعك والوسايط اللي عمال ترصهم من الصبح، أول ما جالهم إخطار من النيابة العامة بتهمة الشروع في ضرر مع سبق الإصرار والترصد، وتزوير محررات رسمية واستخدام أدوية غير مناسبة بدون روشتات، قفلوا تليفوناتهم. مفيش لواء ولا مستشار هيلطخ اسمه عشان خاطر واد فافي كان بيستقوى على مراته المحبوسة في الحمام. والفيلا دي؟ من الساعة تسعة الصبح مبقتش ملكك ولا ملك الهانم والدتك. المزاد اتفتح واتقفل في جلسة تسوية مغلقة لصالح مجموعة الصاوي اللوجستية، والورق اللي في إيد أمين الشرطة ده أمر طرد فوري مع التحفظ على كل المنقولات لسداد جزء من فوايد الديون المتراكمة.

سميحة قامت تزحف على الأرض، حاولت تمسك طرف بنطلون وحيد وهي بتعيط بنحيب مشوه ملوش أي علاقة بالست الأرستقراطية اللي كانت واقفة بالليل تتشمت

يا فندم.. يا متر.. أبوس إيدك فهمني! فتحي مين ده؟ إزاي فتحي بتاع شبرا اللي كان بيقعد في الصالون المدهب المعفن ويشرب شاي في كوباية جبنة، يبقى هو صاحب الملايين دي كلها؟! ده كان بيبعتلنا كرتونة مانجا وليمون من شجره في المواسم! إزاي ده يحصل؟!

وحيد بصلها من فوق لتحت بقرف حقيقي ونزل على ركبته عشان صوته يوصل لودنها زي السم

فتحي الصاوي لما قعد في صالون بيته المتواضع، كان بيمتحن أصلكوا ونضافتكوا من جوة. الراجل شقي خمسين سنة وبنى أسطول تريلات ومستودعات بتخدم تلتين تجارة الاستيراد في مصر، وكان مستعد يكتب نص الإمبراطورية دي باسم بنته الوحيدة مريم. بس أنتوا عميتكم المظاهر وشوفتوا الهدوم البسيطة مقياس للبني آدم. أنتوا مش بس خسرتوا بنته، أنتوا فتحتوا على نفسكم باب جهنم اللي هيدفنكم بالحيا.

في اللحظة دي، طارق اتسحب على برة تحت أنظار الجيران في كمبوند التجمع، اللي كانوا طالعين في البلكونات وواقفين على أبواب الفلل يتفرجوا على الفضيحة اللي ملهاش مثيل. عربيات البوكس خدت طارق على النيابة، وسميحة وقفت في الشارع بشنطة يد صغيرة بعد ما اتمنعت تاخد حتى مجوهراتها اللي اتحرزت بحكم المحكمة لسداد الديون.

في المستشفى الجوي، كانت الساعة داخلة على الضهر. الشمس دخلت من شباك أوضة الرعاية المركزة اللي فتحي حجزها بالكامل ونقل فيها أحسن فريق طبي وتمريضي في القاهرة.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى